Monsoon 2023| હવામાન નિષ્ણાત અંબાલાલ પટેલે વધુ એકવાર ચોમાસાને લગતી આગાહી કરી છે. તેઓએ હવે ચોમાસાનો ચોથો રાઉન્ડ ક્યારે આવશે તેની તારીખ જાહેર કરી છે. ગુજરાતમાં ચોમાસાના ત્રણ રાઉન્ડ ભારે રહ્યા છે. ત્યારે હવે ચોથો રાઉન્ડ પણ ધડબડાટી બોલાવશે તેમ અંબાલાલ પટેલે જણાવ્યું છે.
હવામાન આગાહીકાર અંબાલાલ પટેલે આગાહી કરતા જણાવ્યું કે, આજે રાજ્યમાં વીજળીના કડાકા સાથે વરસાદની આગાહી છે. પરંતુ ફરીથી રાજ્યમાં 27 જુલાઈથી વરસાદનું જોર વધશે. 27 જુલાઈથી 5 ઓગસ્ટ સુધી પવન અને ભેજનું ગેસ્ટ પશ્ચિમ ભારત ઉપર અસર વર્તાવશે. જેનાથી દક્ષિણ ગુજરાત અને દક્ષિણ સૌરાષ્ટ્રના ભાગોમાં ભારે વરસાદ પડશે.
તે ઉપરાંત અંબાલાલ પટેલે જણાવ્યું કે, ઓગસ્ટના પહેલા અઠવાડિયામાં રાજ્યના મોટાભાગના જિલ્લાઓમાં ભારે વરસાદ વરસશે. ઉત્તર ગુજરાત અને મધ્ય ગુજરાતની નદીઓમાં પૂરની સ્થિતિ જોવા મળશે. સાબરમતી નદી બે કાંઠે વહેતી થશે. તો તાપી અને નર્મદાના જળ સ્તરમાં પણ વધારો થશે.
આગામી પાંચ દિવસને લઈને હવામાન વિભાગના ડાયરેક્ટર ડો.મનોરમા મોહંતીએ કહ્યું કે, ગુજરાતમાં આગામી દિવસોમાં ભારે વરસાદની શક્યતા નહિવત છે. આ દિવસોમાં વલસાડ, ભરૂચ, બનાસકાંઠા જેવા વિસ્તારોમાંની એકાદ જગ્યાએ ભારે વરસાદ રહી શકે છે. આજે મંગળવારથી ગુજરાતમાં વરસાદનું જોર ઓછું થશે. આ દિવસોમાં અમદાવાદમાં હળવાથી મધ્યમ વરસાદ વરસી શકે છે. ગુજરાતમાં અત્યાર સુધીનો સીઝનલ વરસાદનો 83% વરસાદ પડ્યો છે. સૌરાષ્ટ્રમાં સામાન્ય કરતા આ વર્ષે કુલ વરસાદના 20% વધુ વરસાદ રહ્યો, જેથી કુલ 120% વરસાદ નોંધાયો છે.
વરસાદના આંકડા પર એક નજર કરીએ તો, ગુજરાતમાં સિઝનનો સરેરાશ 78% વરસાદ વરસ્યો છે. કચ્છમાં 124%, સૌરાષ્ટ્રમાં 100% વરસાદ વરસ્યો છે. જયારે ઉત્તર ગુજરાતમાં 58%, દક્ષિણ ગુજરાતમાં 54% વરસાદ વરસ્યો છે. તેમજ મધ્ય ગુજરાતમાં 53% જેટલો વરસાદ નોંધાયો છે. જેમાં સૌથી વધુ જૂનાગઢ જિલ્લામાં 143% વરસાદ ખાબક્યો છે. આ ઉપરાંત કચ્છમાં 124%, ગીર સોમનાથમાં 118% વરસાદ રહ્યો. રાજકોટમાં 104%, જામનગરમાં 101% વરસાદ રહ્યો. દેવભૂમિ દ્વારકામાં 100%, પોરબંદરમાં 95% વરસાદ નોંધાયો. ભાવનગરમાં 89%, બોટાદમાં 88% વરસાદ, અમરેલીમાં 80% વરસાદ, મોરબીમાં 65%, સુરેન્દ્રનગરમાં 64% વરસાદ ખાબક્યો છે. આમ, ગુજરાતમાં સિઝનનો કુલ 78% વરસાદ નોંધાયો છે.
