Surat| સુરતના સચિન GIDCમાં નવી કંપનીનું વાયરીંગ કરનાર ઇલેક્ટ્રિશિયનને વીજ કરંટ લાગતા મોત નિપજ્યું છે. યુવક હજુ એક મહિના પહેલા જ જુડવા બાળકોનો પિતા બન્યો હતો. ત્યારે યુવકના મોતથી બે બાળકોએ પિતાની છત્રછાયા ગુમાવી છે. તેના નિધનથી પરિવાર શોકમાં ગરકાવ થઈ ગયો છે.
સુરતના સચિન જીઆઇડીસી ખાતેના ડાયમંડ પાર્કમાં આવેલા શ્રી કૃષ્ણ સ્ટીલ કંપનીમાં એક કર્મચારીને કરંટ લાગવાની ઘટના બની હતી. કંપનીના 30 ફૂટ ઊંચા પતરાના શેડ પર અંદરની સાઈડ પર લાઇટનું કામકાજ કરવા જતા યુવકને કરંટ લાગ્યો હતો. કરંટ લાગતા યુવક ત્યાં જ બેભાન થઇ ગયો હતો. ઘટનાની જાણ ફાયર વિભાગને કરવામાં આવી હતી. જેથી ફાયરની ટીમ ઘટના સ્થળે પહોંચી ગઈ હતી અને યુવકને 30 ફૂટ ઊંચા પતરા પરથી નીચે ઉતાર્યો હતો અને 108ની મદદથી સારવાર માટે સિવિલ હોસ્પિટલ ખસેડ્યો હતો. જ્યાં ફરજ પરના તબીબએ મૃત જાહેર કર્યો હતો. યુવકના મોતને પગલે બે બાળકોએ પિતાની છત્રછાયા ગુમાવી છે. પરિવાર શોકમાં ગરકાવ થઈ ગયો છે. આ યુવકનું નામ વિજય ચિત્તે હોવાનું સામે આવ્યું છે.
સુરતના સચિનના કનકપુર ખાતે આવેલા સરસ્વતી આવાસમાં રહેતા 30 વર્ષીય વિજય રામદાસ ચિત્તે વાયરીંગનું કામકાજ કરતો હતો. હાલમાં વિજય ચિત્તે સચિન જીઆઇડીસીમાં આવેલા ડાયમંડ પાર્ક ખાતે નવી બની રહેલી કૃષ્ણ સ્ટીલ કંપનીનું વાયરીંગનું કામ કરી રહ્યો હતો. વિજય ચિત્તેને 30 ફૂટ ઊંચા પતરાના શેડ પર ક્રેનની મદદથી ચડાવવામાં આવ્યો હતો. ત્યારબાદ ક્રેન અન્ય કોઈ કામ માટે ત્યાંથી ચાલી ગઈ હતી. આ દરમિયાન કામકાજ ચાલી રહ્યું હતું ત્યારે વિજયને જોરદાર વીજ કરંટ લાગ્યો હતો. જેથી તે પતરા પર જ બેભાન થઈ ગયો હતો. જોકે વિજયનો અવાજ ન આવતા અન્ય તેના સાથી કર્મચારીઓ ચિંતામાં મુકાયા હતા. જેને લઇ તાત્કાલિક ફાયર બ્રિગેડને જાણ કરીને બોલાવવામાં આવી હતી. ફાયર વિભાગની ટીમ હાઇડ્રોલિક સાધન સાથે ઘટના સ્થળે પહોંચી ગઈ હતી. ફાયર વિભાગ પાસે હાઇડ્રોલિક મશીન સાથેની જે સીડી હોય છે તેનો ઉપયોગ કરીને ફાયરની ટીમ પતરા ઉપર પહોંચી હતી અને બેભાન પડેલા યુવકને તાત્કાલિક નીચે ઉતારવામાં આવ્યો હતો.
ઇલેક્ટ્રિશિયન વિજય ચિત્તેને કરંટ લાગતા સારવાર માટે હોસ્પિટલમાં ખસેડાયો હતો. જ્યાં ફરજ પરના તબીબોએ તેને મૃત જાહેર કર્યો હતો. વિજય ચિત્તે મૂળ મહારાષ્ટ્રનો વતની હતો. તે સચિન વિસ્તારમાં તેની પત્ની અને બે બાળકો સાથે રહેતો હતો. પત્નીએ એક મહિના પહેલા જ બે જુડવા બાળકોને જન્મ આપ્યો હતો. ત્યારે વિજયના કરંટ લાગવાથી અચાનક મોતને પગલે બે બાળકોએ પિતાની છત્રછાયા ગુમાવી છે. તથા મૃતકનો પરિવાર શોકમાં ગરકાવ થઈ ગયો છે.
આ સમગ્ર બનાવની જાણ સચિન જીઆઇડીસી પોલીસને કરવામાં આવી છે. પોલીસે કરંટથી મોતને ભેટનાર ઇલેકટ્રીશીયનને પીએમ માટે સિવિલ હોસ્પિટલ મોકલી આપ્યો હતો. પોલીસે આ અંગે હાલ અકસ્માતે મોતનો ગુનો નોંધી વધુ તપાસ હાથ ધરી છે.
