Panchmahal| ઓનલાઈન જુગારની ગેમ રમતો એક યુવક જિંદગીની ગેમ હારી બેઠો હોવાનો સમાજ માટે લાલબત્તી સમાન કિસ્સો રાજ્યના પંચમહાલ જિલ્લાથી સામે આવ્યો છે, જ્યાં એક યુવક ગેમમાં પૈસા હારી જતા ગળે ફાંસો ખાઈ આત્મહત્યા કરવાનો ચકચારી કિસ્સો સામે આવ્યો છે.
આજકાલ ઓનલાઈન ગેમિંગના રવાડે ચડેલા યુવાનો દેવું કરીને તેના ભાર નીચે દબાઈ જતા અંતિમ પગલું ભરતા અચકાતા નથી અને તેમાંય ઓનલાઈન જુગાર રમાડતી એપ્લિકેશનની જ્યારે ભરમાર જોવા મળી રહી છે. ત્યારે આવા સમયે મોબાઈલ વપરાશકર્તાઓ આવી એપ્લિકેશનની જાળમાં ફસાઈ જતા જોવા મળે છે. આવો જ એક બનાવ પંચમહાલથી સામે આવ્યો, જ્યાં એક યુવાન રમી ગેમ રમતા એકાઉન્ટમાંથી પૈસા કપાઈ જતા એક સુસાઇડ નોટ લખી ગળે ફાંસો ખાઈ આત્મહત્યાનું પગલું ભર્યું છે.
પંચમહાલ ના ગોધરા રેલવે પોલીસ સ્ટેશન હદ વિસ્તારમાં આવેલ બાકરોલ રેલવે સ્ટેશન નજીક ઝૂંપડું બાંધી રેલવે ના કોન્ટ્રાક્ટમાં મજૂરી કામ કરતા મધ્યપ્રદેશના જાંબુઆના 30 વર્ષીય વિનોદ પારધી નામના યુવકને ઓનલાઈન રમી નામની ગેમનો એવો ચસ્કો હતો કે તે પોતાની મજૂરીથી કમાયેલા પૈસા આવી ગેમમાં રોકી જુગાર રમતો હતો. કેટલીક વખત સારા પૈસા મળતા પોતાની બચતના અંદાજીત 3 લાખ રૂપિયા જેટલી માતબર રકમ દાવ પર લગાડી હતી. જે રકમ હારી જતા વિનોદ ડિપ્રેશનમાં આવી ગયો હતો.
પોતે હવે શું કરશે અને પરિવારને શું મોઢું બતાવશે તેવા વિચારોથી ઘેરાયેલા વિનોદે પોતે એક સુસાઇડ નોટ લખી તેમાં પોતાની વ્યથા વર્ણવી પોતે જ્યાં રહેતો હતો તે ઝૂંપડપટ્ટીની સામે રેલવેના નવા બનેલ કવાર્ટરની જાળી પર દોરડું બાંધી ગળે ફાંસો ખાઈ મોતને વ્હાલું કર્યું હતું. પરિવારના આધારસ્તંભ જેવા વિનોદના મોતના સમાચાર સાંભળી પરિવાર જનોમાં ઘેરા શોકની લાગણી વ્યાપી ગઈ હતી.
ઘટનાને પગલે ગોધરા રેલવે પોલીસે વિનોદની ડેડ બોડીને પોસ્ટમોર્ટમ અર્થે મોકલી સુસાઇડ નોટ કબજે કરી વધુ કાયદેસરની કાર્યવાહી હાથ ધરી છે.
