Amreli| અમરેલી જીલ્લાના ખાંભા તાલુકાના ડેડાણ ગામમાં વર્ષોથી દારૂના વેચાણ સામે જગૃત ગ્રામજનો પોતાનો વિરોધ નોંધાવી રહ્યા છે. ત્યારે ગામમાં ફરીથી કાળા બોર્ડ પર દારૂનો વેપાર કરનાર લોકોના નામ લખીને જાહેરમાં મુકાયા હતા. આ બોર્ડ પર 10થી વધુ દારૂના વેપારીઓના નામનો ઉલ્લેખ કરાયો છે. આ બોર્ડનો ફોટો સોશિયલ મીડિયામાં વાયરલ થયો છે. જે બાદ પોલીસે તપાસ કર્યાનું પણ કહેવામાં આવી રહ્યુ છે. આપને જણાવી દઈએ કે, આ પહેલા પણ ડેડાણ ગામમાં દારૂ વેચાઇ છે તેવા બોર્ડ લગાવવામાં આવ્યા હતા.
બોર્ડ પર દારૂના વેપારીઓના નામ લખાયા
આ કાળા બોર્ડ પર જાગૃત નાગરિકોનો વિરોધ દેખાઇ રહ્યો છે. આ બોર્ડ પર 27-8-23 એટલે ગઇકાલની તારીખ છે. જેમાં લખાયેલુ છે કે, ‘ડેડાણ ગામમાં દારૂની રેલમછેલમ. પોલીસ મહેરબાન અમરેલી જીલ્લાના ખાંભા તાલુકાના ડેડાણમાં ઠેર ઠેર દેશી દારૂના ભઠ્ઠા, હાટડા ખાંભા પોલીસની રહેમ હેઠળ ચાલે છે.’ આ સાથે દારૂના વેપારીઓના નામ લખવામાં આવ્યા છે.
મળતી માહિતી પ્રમાણે સ્થાનિક લોકો દારૂના ધમધમતા કારોબારને કારણે ઘણાં જ કંટાળી ગયા છે. જોકે, આ અંગે હજી પોલીસ દ્વારા કોઇ જ કામગીરી થઇ નથી તેવા પણ સમાચાર મળી રહ્યા છે. જેના કારણે બે દિવસ પહેલા પણ આવા બોર્ડ સ્થાનિકોએ લગાવ્યા હતા અને ફરીથી આ બોર્ડ લગાવવામાં આવી રહ્યા છે.
‘દારૂ માટે દિવ ન જવુ’
ગત વર્ષે પણ અમરેલી જિલ્લામાં ખાંભાના ડેડાણ ગામમાં કેટલા કેટલા સ્થળે દારૂની હાટડીઓ ચાલી રહી હતી તેના નામ સરનામા સાથેનુ બોર્ડ જાહેર ચોકમાં જ મુકવામાં આવ્યું હતુ. ત્યારે પણ પોલીસ દોડતી થઇ ગઇ હતી અને ઠેકઠેકાણે દરોડા પાડયા હતા. ગત વર્ષે આ ગામમાં મુકાયેલા કાળા બોર્ડ ચર્ચામાં રહ્યા હતા. જેની પર લખ્યુ હતુ કે, ‘દારૂ માટે દિવ ન જવુ, ખાંભામાં જ મળી જશે.’ આ વિસ્તારના જાગૃત લોકો પોલીસની ઉંઘ ઉડાવવાના પ્રયત્નો કરી રહ્યા છે.
ગત વર્ષે બસ સ્ટેન્ડ ચોકમાં જ ગ્રામ પંચાયતના નોટીસ બોર્ડ પર જ આવું લખાણ મુકાયું હતુ કે, દારૂ માટે દિવ ન જવુ, ખાંભામા મળી રહેશે. આ સાથે અન્ય વિગતો પણ મૂકવામાં આવી હતી.
