ગુજરાતના યુવાનોને નશાના રવાડે ચડાવી બરબાદ કરવાનું જાણે કારસ્તાન ચાલુ થયુ હોય તેમ લાગી રહ્યું છે. અગાઉ ગુજરાત યુનિવર્સિટીની બોય્સ હોસ્ટેલમાંથી ગાંજાના છોડ મળી આવ્યા પછી જાણે એક પછી એક લાઇન લાગી હોય તેવી ઘટનાઓ ગુજરાતમાં બની રહી છે. તે ઘટના બાદ ગાંધીજીની વિચારધારા પર ચાલતી ગુજરાત વિદ્યાપીઠમાંથી દારૂની બોટલ મળી આવી હતી, અને હવે રાજ્યમાં એવી પ્રવૃતિઓ સામે આવી છે જેને કારણે ગુજરાતને કોઇની નજર લાગી હોય તેમ જણાઈ રહ્યું છે. રવિવારે અમદાવાદમાં ઈનડોર ગાંજાનું સૌથી મોટું વાવેતર ઝડપાયું છે.
મળતી માહિતી મુજબ સરખેજના ઓર્ચિડ લેગસી ફ્લેટમાં પોલીસ દ્વારા મોટી કાર્યવાહી હાથ ધરવામાં આવી છે. ખાનગી બાતમીને આધારે પોલીસે અમદાવાદના સરખેજ રોડના ઓર્ચિડ લેગસી ફ્લેટમાં દરોડા પાડ્યા હતા. જેમાં આ લેબ ઝડપાઈ છે. દરોડા દરમિયાન પોલીસને 200 કુંડામાં માદક પદાર્થના છોડ મળી આવ્યા હતા. હાલમાં પોલીસે તમામ છોડ કબ્જે કર્યા છે.
આ આરોપીઓ માદક પદાર્થના છોડ ઉછેરીને વિદેશમાં વ્યાપાર કરતા હોવાનું અનુમાન લગાવામાં આવી રહ્યું છે. મળતી માહિતી અનુસાર ઝારખંડના રહેવાસી મુજબ માદક પદાર્થના 200 છોડનો ઉછેર કરતા હોવાનું પોલીસ તપાસમાં સામે આવ્યું છે. પોલીસે સમગ્ર મામલે 1 યુવતી અને 2 યુવકોની ધરપકડ કરીને મુદ્દામાલને જપ્ત કર્યો છે. હજુ પણ પોલીસ દ્વારા માદક પદાર્થની લેબમાં તપાસ ચાલી રહી છે. પોલીસે સમગ્ર મામલે વધુ તપાસ હાથ ધરી છે.
અમદાવાદના સરખેજમાંથી હાઇપ્રોફાઈલ ફલેટમાંથી ગાંજાનું વાવેતર મળ્યું હતું. જેમાં જાણવા મળી રહ્યું છે કે, સરખેજના ઓર્ચિડ લેગસીના D2 ફલેટના 1501 અને 1502ના ફલેટમાંથી ગાંજાનું વાવેતર મળ્યું છે. હાઇડ્રોપોનિક્સના પ્રકારના ગાંજાનું વાવેતર મળી આવ્યું છે. ગાંજાના કુંડામાં એમિનો એસિડ નાખવામાં આવતું હતું, જેને કારણે ગાંજાનું ઉત્પાદન જલ્દીથી થઇ શકે. આ ફ્લેટમાં અંદાજિત 100 કુંડામાં ગાંજાનું વાવેતર કર્યું હતું.
મળતી માહિતી અનુસાર, આરોપીઓ બંને ફલેટનું રૂપિયા 35 હજાર ભાડું ચુકવતા હતા. ગાંજાના વાવેતર માટે અત્યંત આધુનિક ટેકનોલોજીનો ઉપયોગ કર્યો હતો. ગ્રીન હાઉસ પદ્ધતિથી વાવેતર કરવા સર્કિટ અને ટેમ્પ્રેચરનું આયોજન કર્યું હતું. 100 કુંડામાં 5 સેન્ટીમીટર જેટલા ઊંચા ગાંજાના છોડ ઉગ્યા હતા.
આ ઘટનામાં ગાંજાનું બિયારણ ક્યાથી લાવ્યા એ અંગે પોલીસે તપાસ શરૂ કરી છે. ગાંજાનું વાવેતર વેચાણ કરવાના હેતુથી કર્યું હતું. દોઢ માસ પહેલા લેબમાં છોડ ઉગાડવાનું શરૂ કર્યું હતું. ફલેટમાં મોટા પાર્સલ આવ્યા હતા, જેથી સ્થાનિકોને શંકા ગઈ હતી. આ મામલે સ્થાનિકોએ પોલીસને સંપર્ક કર્યો હતો અને પોલીસે તપાસ હાથ ધરતા ફ્લેટમાંથી ગાજાનું વાવેતર મળી આવ્યું હતું. ગુજરાતમાં આ પ્રકારે પહેલી વાર ગાંજાનું વાવેતર મળ્યું હતું.
