વડોદરાથી એક કિસ્સો પ્રકાશમાં આવ્યો છે. જેમાં 3 વર્ષની એક બાળકીનું અપહરણ કરવામાં આવ્યું હતું. વડોદરાના ડભોઈ ખાતે રાધે કોમ્પલેક્ષ વિસ્તારમાંથી 3 વર્ષની બાળકીનું દુષ્કર્મના ઇરાદે અપહરણ થતા સમગ્ર પંથકમાં ચકચાર મચી જવા પામી હતી.
શું છે ઘટના ક્રમ?
ડભોઇ શહેરના રાધે કોમ્પ્લેક્સ વિસ્તારમાં બે દિવસ પૂર્વે એક 3 વર્ષની બાળકી પોતાના ઘર પાસે રમી રહી હતી. જે દરમિયાન એક અજાણ્યા ઈસમ દ્વારા ત્રણ વર્ષની બાળકીને પટાવી ફોસલાવીને પોતાની સાથે લઈ ગયો હતો. સમગ્ર ઘટનાને ડભોઇ પોલીસ સ્ટેશનમાં નોંધાતા પોલીસ દ્વારા અલગ અલગ ટીમો બનાવી આરોપીને શોધવાના પ્રયત્નો હાથ ધરવામાં આવ્યા હતા, સાથે સાથે સીસીટીવીના માધ્યમથી અનેક જગ્યાઓ પર પૂછપરછનો ધમધમાટ શરૂ કરી દેવામાં આવ્યો હતો.
પોલીસને કેવી રીતે મળી સફળતા
સમગ્ર કેસમાં પોલીસ દ્વારા અલગ અલગ ટીમો બનાવી આરોપીને પકડવાના ચક્રો ગતિમાન કરવામાં આવ્યા હતા. જે દરમિયાન પોલીસે સીસીટીવીને વધુ મહત્વ આપી શહેરના તમામ સીસીટીવી ચેક કરવામાં આવ્યા હતા. જે સમય દરમિયાન એક લીલા કલરનો શર્ટ પહેરી ઈસમ શહેરના સિનોર ચોકડી ખાતેથી એક ઓટો રિક્ષામાં નાની બાળકીને લઈને બેઠો હતો, જે ગતિવિધિ સીસીટીવીમાં કેદ થઈ ગઈ હતી.
જેને લઈને પોલીસ દ્વારા અલગ અલગ રિક્ષાવાળાઓને પૂછપરછ હાથ ધરી હતી. જેમાં પોલીસ અસફળ રહી હતી. પરંતુ સમગ્ર કેસમાં પોલીસ દ્વારા સીસીટીવી સોશિયલ મીડિયા ઉપર વાયરલ કરવામાં આવ્યા હતા. જેમાં એક વ્યક્તિનો પોલીસ ઉપર ફોન આવ્યો હતો અને તેણે જણાવ્યું હતું કે, સોશિયલ મીડિયામાં દેખાતો આ શખ્સ બુજેઠા ગામે રહે છે અને આજે સવારથી એક નાની બાળકી તેની સાથે છે. જેને લઈને પોલીસ દ્વારા ચોક્કસ જગ્યા ઉપર રેડ કરવામાં આવી હતી. જેમાં એક નાની ત્રણ વર્ષની બાળકી અને એક શખ્સ મળી આવ્યો હતો.
પોલીસ કાર્યવાહી
પોલીસે આરોપી અમૃત વણકરની ધરપકડ કરી કાયદેસરની કાર્યવાહી હાથ ધરી છે, સાથે જ પકડાયેલ આરોપી દ્વારા બાળકી સાથે કોઈપણ શારીરિક ચેનચાળા કર્યા છે કે નહીં તે દિશામાં તપાસ કરી છે. ત્યારે આવનારા દિવસોમાં હેવાન અમૃત વણકરને કયા પ્રકારની સજા થાય છે તે જોવાનું રહ્યું.
