દાણીલીમડામાં ચાની કીટલી પર પૈસા આપવા બાબતે માલિક સહિત 3 લોકોએ ગ્રાહક પર હુમલો કર્યો

by ND
Danilimda Police Station, News Inside

અમદાવાદ :  દાણીલીમડામાં ચાની કીટલી પર ચા ના પૈસા બાબતે ટી સ્ટોલના માલિક, કારીગર સહિત 3 લોકોએ ગ્રાહક પર હુમલો કર્યો હોવાની ઘટના સામે આવી છે. ચાની કીટલી પર એક યુવક ચા પી રહ્યો હતો, ત્યારે કારીગર 100 રૂપિયાનો હિસાબ લઈને આવ્યો હતો. યુવકે ચા પીધા પછી રૂપિયા આપવાનું કહેતા કારીગરે તેને ગાળો બોલી હતી, ત્યારબાદ મામલો બિચક્યો અને યુવકને મારમાર્યો હતો. આ અંગે યુવકે દાણીલીમડા પોલીસ સ્ટેશનમાં ફરિયાદ નોંધાવતા પોલીસે તપાસ હાથ ધરી છે.

જમાલપુર વિસ્તારમાં રહેતા બાદશાહખાન પઠાણે દાણીલીમડા પોલીસ સ્ટેશનમાં ઇરફાન ગુલામ મિર્ઝા, સાજીદ ઉર્ફે સજ્જુ ટકલુ તેમજ કૈફ વિરુદ્ધ મારમારીની ફરિયાદ કરી છે. બાદશાહખાન પઠાણ રિક્ષા ચલાવીને પોતાનું તેમજ પરિવારનું ગુજરાન ચલાવે છે. બાદશાહ રોજ દાણીલીમડા ખાતે આવેલી સલમાન ગુલફામ મીર્ઝાની ચાની કીટલી પાસે ઉભો રહે છે અને ત્યાથી પેસેન્જર ભરે છે. બાદશાહ રોજ ત્યાથી ચા-પાણી પીવે છે અને રાતે જ્યારે તે ઘરે જાય ત્યારે આખા દિવસનો હિસાબ ચૂકવી દે છે. બાદશાહ ચાની કિટલી ધરાવતા સલામન તેના મોટા ભાઇ ઇરફાન કેફને સારી રીતે ઓળખે છે અને ચાની કીટલી પર બેસતા સાજુદ ઉર્ફે સજ્જુ ટકુલને પણ ઓળખે છે. ગઇકાલે રાતે મિર્ઝા ટી સ્ટોલ પર બાદશાહ ચા પીવા માટે બેઠો હતો, ત્યારે કૈફ તેની પાસે આવ્યો હતો અને આખા દિવસના 100 રૂપિયાની હિસાબ આપ્યો હતો.

બાદશાહે ચા પીધા પછી રૂપિયા આપવાનું કૈફને કહ્યું હતું. કૈફે ગાળ બોલીને બાદશાહને કહ્યું હતું કે, પૈસા ના આપવા હોય તો ઉધારમાં આખો દિવસ ચા કેમ પીવે છે. બાદશાહે ગાળ બોલવાની ના પાડીને કહ્યું હતું કે, હું ભાગી થોડો જવાનો છું. ચા પીને તારા બાકીના પૈસા આપું છું. કૈફે ટી સ્ટોલ પર બેઠેલા ઇરફાન મિર્ઝા તેમજ સાજીદ ઉર્ફે સજ્જુને બુમો પાડીને બોલાવી દીધા હતા. કૈફે પોતાના માલિકને કહેવા લાગ્યો હતો કે, પૈસા આપતો નથી અને ગાળો બોલે છે. ઇરફાન, સાજીત અને કૈફે ભેગા થઇને બાદશાહ પર હુમલો કરીને તેને મારમાર્યો હતો. બાદશાહે બુમાબુમ કરતા આસપાસના લોકો દોડી આવ્યા હતા અને તેને બચાવી લીધો હતો. ત્રણેય જણાએ બાદશાહને બધાની વચ્ચે જાનથી મારી નાખવાની ધમકી આપી હતી. બાદશાહે આ મામલે તરત જ દાણીલીમડા પોલીસ સ્ટેશન પહોંચી ગયો હતો. જ્યા તેને ફરિયાદ કરી છે. દાણીલીમડા પોલીસે આ મામલે ગુનો નોંધીને તપાસ શરૂ કરી છે.

Related Posts