News Inside/24 May 2023
Gujarat
ગાંધીનગર। હવામાન નિષ્ણાંત અંબાલાલ પટેલ દ્વારા ફરી એક મોટી આગાહી કરવામાં આવી છે. તેમના દ્વારા ચાલુ મહિનાના અંતમાં રાજ્યના જુદા-જુદા વિસ્તારોમાં ભારે વરસાદ થવાની સંભાવના વ્યક્ત કરવામાં આવી છે. અંબાલાલ પટેલે રાજ્યના ઘણાં ભાગોમાં વરસાદ થવાની શક્યતાઓ વ્યક્ત કરી છે. જેમાં ઉત્તર, મધ્ય અને દક્ષિણ ગુજરાત તથા સૌરાષ્ટ્રના કેટલાક ભાગોનો સમાવેશ થાય છે. અંબાલાલ પટેલે વરસાદ અંગે આગાહી કરતા જણાવ્યું છે કે, ગુજરાતમાં આગામી 25, 26, 27, 28 અને 29 મેએ ભારે વરસાદ થવાની સંભાવના છે. તેમણે એમ પણ કહ્યું છે કે, બનાસકાંઠા જિલ્લાના વાવ અને થરાદ તાલુકા, તથા અરવલ્લી, સાબરકાંઠાની સાથે મધ્ય ગુજરાતના આણંદ, વડોદરા, બોડેલી, નડિયાદ, ખેડામાં વરસાદ થવાની શક્યતાઓ છે.
પ્રિ-મોન્સૂન એક્ટિવિટી દરમિયાન મધ્ય અને ઉત્તર ગુજરાત સિવાય અંબાલાલ પટેલે પંચમહાલના અને પૂર્વ ગુજરાતના વિવિધ ભાગોમાં પણ વરસાદ થવાની શક્યતાઓ વ્યક્ત કરી છે. સૌરાષ્ટ્રના દરિયાકિનારાના વિસ્તારોમાં પણ તેમણે વરસાદ થવાની સંભાવના વ્યક્ત કરી છે. દક્ષિણ ગુજરાતના વિસ્તારોમાં પણ વરસાદ થઇ શકે છે. આ સિવાય કચ્છના ભાગોમાં પણ તેમણે વરસાદ થવાની શક્યતાઓ વ્યક્ત કરી છે.
અંબાલાલ પટેલ દ્વારા વરસાદની જે સંભાવના વ્યક્ત થઇ છે તે જોતા લગભગ આખા ગુજરાતમાં ચોમાસા જેવો માહોલ બની શકે છે. તેમણે રોહિણી નક્ષત્રની સ્થિતને જોતા પ્રિ-મોન્સૂનમાં ચોમાસા જેવી સ્થિતિ બનશે તેવી શક્યતાઓ વ્યક્ત કરી છે.
અંબાલાલે જૂન મહિના અંગે પણ આગાહી કરીછે.જેમાં તેમણે જણાવ્યું છે કે, જૂન મહિનાની શરુઆતમાં અરબી સમુદ્રમાં ભારે હલચલ જોવા મળી શકે છે. તે જ રીતે બંગાળની ખાડીમાં પણ હલચલ જોવા મળી શકે છે. તેમણે જણાવ્યું છે કે, અરબી સમુદ્રમાં હવાનું હળવું દબાણ બન્યા બાદ ચક્રવાત ઉત્પન્ન થવાની પણ શક્યતાઓ સેવાઈ રહી છે. જોકે, ચક્રવાત કઈ દિશામાં આગળ વધશે તે આગામી સમયમાં માલુમ પડી શકે છે. આ ચક્રવાતને કારણે દક્ષિણ સૌરાષ્ટ્ર સહિત રાજ્યના અન્ય ભાગોમાં વરસાદ થવાની શક્યતાઓ રહેલી છે. જૂનની શરુઆત પછી પણ વરસાદ થવાની શક્યતાઓ અંબાલાલ પટેલ વ્યક્ત કરી રહ્યા છે. આ સાથે તેમણે ભારે આંધી-વંટોળની સાથે 45 કિલોમીટર/કલાકની ઝડપે પવન ફૂંકાવાની શક્યતાઓ વ્યક્ત કરી છે.
