IPL: આઈ પી એલ શરુ થતાં જ માત્ર અમદાવાદમાં જ નહીં પરંતુ દુનિયાભરમાં બૂકી દ્વારા કરોડો રૂપિયાનો સટ્ટો રમાડવાની શરૂઆત થઇ ગઇ છે.
અમદાવાદ ક્રાઇમ બ્રાન્ચના ઇન્સ્પેક્ટર પી.કે. ગોહિલની ટીમે ચાંદખેડાના એક લક્ઝુરિયસ બંગલામાં ચાલતા સટ્ટાના કેન્દ્ર પર દરોડો પાડીને સટ્ટો રમાડતા 12 બૂકીને ઝડપી લીધા છે. તેમની પાસેથી કરોડો રૂપિયાના વ્યવહારોની વિગતો, ડાયરીઓ, લેપટોપ, મોબાઇલ ફોન મળી આવ્યા છે. આ તમામ બૂકી રાજસ્થાન અને ઉત્તર પ્રદેશના છે. તેઓ કુખ્યાત બૂકી રવિ માલી, જિતુ માલી અને દિલીપ સોલંકી પાસે સટ્ટો કપાવતા હોવાની વિગતો મળી છે. કરોડો રૂપિયાના વ્યવહારો કરવા માટે તેમણે જરૂરિયાતમંદ લોકોના નામે બેંક એકાઉન્ટ ખોલાવ્યા હતા અને તેમાંથી હવાલા પાડવામાં આવ્યા હોવાની વિગતો પણ સામે આવી રહી છે.
થોડા મહિનાં પહેલાં જ અમદાવાદ ક્રાઇમ બ્રાન્ચની ટીમે રાકેશ રાજદેવ અને જિતુ થરાદ માટે શહેરમાં સટ્ટો રમાડતા બૂકીને ઝડપી લીધા હતા. જેની તપાસમાં 1414 કરોડના હવાલા પાડવામાં આવ્યા હોવાનું સામે આવ્યું હતું. ત્યારબાદ પીસીબીએ માધુપુરામાંથી સટ્ટાધામ ઝડપી 10 હજાર કરોડના હવાલાની વિગતો શોધી કાઢી હતી. તેમ છતાં બૂકીઓ દ્વારા રોજની મેચ પર હજારો કરોડના સટ્ટા રમાડવામાં આવી રહ્યા છે. રવિવારે બેંગલુર- રાજસ્થાન વચ્ચેની મેચ પર મોટા પ્રમાણમાં સટ્ટો રમાડવામાં આવ્યો હતો. ત્યારે જ ક્રાઇમ બ્રાન્ચની ટીમને માહિતી મળી હતી કે ચાંદખેડા સ્વાદ ગાંઠિયા રથની ગલીમાં રોયલ ઓર્ચિડ બંગલોઝના બંગલા નંબર-7માં કેટલાક બૂકી સટ્ટો રમાડી રહ્યા છે. પોલીસે બંગલામાં દરોડો પાડીને જુગાર રમાડતા 12 બૂકીને ઝડપી લીધા હતા. તેઓ જુદી જુદી એપ્લિકેશન મારફતે ઓનલાઇન સટ્ટો લેતા હતા. રાજસ્થાન ઉત્તર પ્રદેશના આ બૂકી માટે કુખ્યાત બૂકી રવિ માલી અને જિતુ માલીએ આ બંગલો ભાડે રાખ્યો હતો.
યુપી અને રાજસ્થાનના બૂકી ઝડપાયા
1. ભંવરલાલ જેઠારામ ચૌધરી (રાજસ્થાન)
2. અશોકકુમાર રાજુરામ સૈન (રાજસ્થાન)
3. અશોક તેજદાસ સંત (રાજસ્થાન)
4. પ્રકાશ ઉર્ફે મુન્નો બાબુલાલ માલી (રાજસ્થાન)
5. ભીયારામ જેઠારામ ડુકિયા (રાજસ્થાન)
6. કિશન મેઘારામ જાટ (રાજસ્થાન)
7. આસુરામ દેવારામ ચૌધરી (રાજસ્થાન)
8. ઘેવરચંદ રૂપારામ જાટ (રાજસ્થાન)
9. કેશારામ અસલારામ ચૌધરી (રાજસ્થાન)
10. રાજેન્દ્ર હરિરામ પ્રજાપતિ (રાજસ્થાન)
11. સુનિલ અમરપાલ ગૌતમ (ઉત્તર પ્રદેશ)
12. દિલીપ સાલીકરામ ગૌતમ (ઉત્તર પ્રદેશ)
જુદા જુદા વ્યક્તિઓના નામે બેંક એકાઉન્ટ
ચાલુ વર્ષે આઇપીએલની મેચમાં જેટલા બૂકી ઝડપાયા છે તેમણે સટ્ટાના રૂપિયા બેંક એકાઉન્ટ મારફતે ટ્રાન્સફર કરવા જુદા જુદા નામે બોગસ બેંક એકાઉન્ટ ખોલાવી તેના મારફતે રૂપિયાના મલ્ટી ટ્રાન્જેક્શન કરાવ્યા હોવાની વિગતો મળી રહી છે. રાકેશ રાજદેવ એન્ડ કંપનીના માણસોએ પણ 1414 કરોડના હવાલા આવી જ રીતે પાડ્યા હતા. માધુપુરા અને ગાંધીનગરમાંથી ઝડપાયેલા સટ્ટાના કેસમાં પણ આ જ મોડેસ ઓપરેન્ડી સામે આવી છે. ચાંદખેડામાં ચાલતા સટ્ટાના ધામમાં પણ આવી જ રીતે બેંક એકાઉન્ટ ખોલાવીને રૂપિયા ટ્રાન્સફર કરાવ્યા હોવાની વિગતો સામે આવી છે.
લક્ઝુરિયસ બંગલો ભાડે રખાયો
સલામત રીતે સટ્ટો રમાડવા માટે બૂકીઓએ ચાંદખેડામાં રોયલ ઓર્ચિડ નામના બંગલોઝમાં એક બંગલો ભારે રાખી તેમાં સટ્ટો લેવાનું શરૂ કર્યું હતું. પાડોશીઓને જાણ ન થાય તે માટે તેઓ બંગલો બંધ જ રાખતા હ
નેપાળની કરન્સી અને દિરહામ મળી આવ્યા
ઝડપાયેલા 12 બૂકી પાસેથી સંખ્યાબંધ ડાયરી, ફોન, લેપટોપ અને જુદી જુદી બેંકની વિગતો પોલીસને મળી હતી. ઉપરાંત કેટલાક બૂકી પાસેથી નેપાળની ચલણી નોટો અને દીરહામ પણ મળી આવ્યા હતા.
હાલ આ સટ્ટાના કેસમાં ઝડપાયેલા બૂકીઓની પૂછપરછ કરવામાં આવી રહી છે.
